#Shteg – me Abaz Hoxha

27 Jan #Shteg – me Abaz Hoxha

Të hënën, më 27 janar do të shfaqet premiera e “legjendës” së kinematografisë shqiptare, profesor Abaz Hoxha.

Një njeri me shumë pasione dhe vullnet, shembull frymëzues për brezat e rinj. Kemi nderin e veçantë të dëgjojmë rrëfimet e disa nga ngjarjeve të jetës së tij nën titullin “Pasionet e mia”, të veteranit të Luftës Nacional Çlirimtare, një nga themeluesit e kinematografisë shqiptare dhe kuadri i parë i lartë me arsim profesional i saj.
Anëtar i Redaksisë së Arteve dhe Arkitekturës në Akademinë e Shkencave për hartimin e Fjalorit Enciklopedik Shqiptar, themelues organizator.
17 vjet drejtues i Arkivit Shtetëror Qëndror të Filmave (Antar i Federatës Ndërkombëtare të Arkivave të Filmave (FIAF) nga viti 1963. Anëtar i Këshillit Shkencor të AQSHF, Anëtar i Lidhjes së Shkrimtarëve dhe Artistëve.
Pedagog i Universitetit të Arteve dhe i Akademise së Filmit dhe Multimedias “Marubi” ku ka dhënë lëndën e Historisë së Kinematografisë Botërore dhe shqiptare.
Publiçist dhe autor i mbi 180 shkrimeve të karakterit problemor dhe studimor si dhe autor i 24 librave të botuara për kinematografinë shqiptare dhe botërore dhe figurave përfaqësuese të tyre. Hartues i Enciklopedisë së parë të Artit, etj.

Që prej datës 20 janar, çdo të hënë dhe të enjte, në orën 11:00, Qendra Multimediale Shteg (www.shteg.al) ka filluar të shfaqë në kinemanë e Akademisë së Filmit dhe Multimedias Marubi, rrëfimet dokumentarë të realizuar mbi jetën dhe punën e disa prej autorëve më të rëndësishëm të fushës së gjuhësisë, letërsisë, përkthimit dhe historisë së kinematografisë shqiptare.

Rrëfimet e çdo autori janë ndarë në 3 episode 10-15 minutëshe, të cilat publiku mund t’i shikojë online në shteg.al, ndësa tek Akademia e Filmit dhe Multimedias Marubi do të shfaqen të plota për publikun në kinema.

Hyrja për publikun është e lirë!
Kjo nismë u realizua me mbështetjen e Akademisë së Filmit dhe Multimedias Marubi, Galerisë ZENIT dhe punën vullnetare të miqve dhe dashamirësve të artit dhe kulturës shqiptare.